सर्वाधिक धनराशिको फ्रेन्चाइज लिग बन्दै पीपीएल

|
सर्वाधिक धनराशिको फ्रेन्चाइज लिग बन्दै पीपीएल


आगामी कार्तिक दोस्रो साता सुन्दर पर्यटकीय नगर पोखरामा आयोजना हुन गइरहेको पोखरा प्रिमियर लिग (पीपीएल) टी२० क्रिकेट प्रतियोगिताको विजेताले प्राप्त गर्ने धनराशिको घोषणा गरिएको छ । आयोजक क्विन्स इभेन्ट्स म्यानेजमेन्ट प्रालिले यस प्रतियोगितामा विजयी हुने टोलीलाई २७ लाख तथा उप विजेता टोलीलाई १० लाख प्रदान गर्ने घोषणा गरेको हो ।

प्रतियोगिताका म्यान अफ दि सिरिज, उत्कृष्ट ब्याट्म्यान र उत्कृष्ट बलरलाई सुजुकी जिक्सर बाइक प्रदान गरिनेछ । नेपाली क्रिकेट इतिहासमा एकै प्रतियोगितामा पुरस्कार बापत ३ वटा बाइक प्रदान गर्न लागिएको सम्भवतः यो पहिलो पटक हो । यस पुरस्कारले खेलाडीमा उत्साह बढ्ने तथा पिपिएल थप रोमाञ्चक हुने अपेक्षा गरिएको छ ।

प्रत्येक खेलको उत्कृष्ट खेलाडीले रिलायन्स सुपर टेक सिमेन्ट म्यान अफ द म्याचले १० हजार रुपैयाँ र ५ हजार बराबरको गिफ्ट प्रदान गरिने भएको आयोजकले जनाएको छ । साथै प्रत्येक खेल जित्ने टिमलाई विनिङ बोनसस्वरुप १५ हजार ५ सय प्रदान गरिने छ ।

नेपाली क्रिकेट विकासमा योगदान दिने उद्देश्यका साथ क्विन्स इभेन्ट्स प्रालिले सुन्दर पर्यटकीय नगर पोखरामा आगामी कात्तिक ९ देखि २० गतेसम्म पोखरा प्रिमियर लिग (पिपिएल) टी–२० क्रिकेट प्रतियोगिता आयोजना गर्न गइरहेको छ ।  ६ टिमको सहभागिता हुने पिपिएल पोखरा रंगशालास्थित क्रिकेट मैदानमा हुनेछ । पिपिएलका लागि टिम घोषणा, मार्की खेलाडी घोषणा र खेलाडी अक्सन भइसकेको छ भने नेपाली क्रिकेटमै पहिलो पटक आधिकारिक रुपमा अनलाइन क्रिकेट फ्यान्टासी पनि सञ्चालन गरिएको छ । पोखरालाई क्रिकेटको न्यूट्रल भेन्यू बनाउने र पोखराको पर्यटन विकासका लागि पोखरा प्रिमियर लिगले महत्वपूर्ण योगदान दिने अपेक्षा गरिएको छ ।